आंतरराष्ट्रीय सहकार वर्षानिमित्त श्री रंगनाथ स्वामी पतसंस्थेचा दिमाखदार सभासद मेळावा संपन्न

मारेगाव :  

                   आंतरराष्ट्रीय सहकार वर्ष २०२५ निमित्त श्री रंगनाथ स्वामी नागरी सहकारी पतसंस्था, वणी यांच्या वतीने मारेगाव येथील शेतकरी सुविधा केंद्रात भव्य सभासद मेळावा उत्साहात पार पडला. मेळाव्याचे उद्घाटन सहाय्यक निबंधक सचिनकुमार कुलमेथे यांच्या हस्ते झाले. अध्यक्षस्थानी पतसंस्थेचे अध्यक्ष ॲड. देविदास काळे होते. प्रमुख पाहुणे म्हणून आमदार संजय देरकर, अरुणाताई खंडाळकर, सुरेश इंगोले, वसंतराव आसुटकर, तसेच माजी मुख्य कार्यकारी अधिकारी श्री तांबेकर उपस्थित होते.

       या वेळी मान्यवरांनी “सहकारातूनच ग्रामीण भागाची आर्थिक समृद्धी साधता येते” असा संदेश दिला. संचालक अरविंद ठाकरे आणि उदय रायपुरे यांनी सहकार क्षेत्राच्या बळकटीसाठी तंत्रज्ञानाचा वापर व सभासदांच्या सक्रिय सहभागाचे महत्त्व स्पष्ट केले. अध्यक्ष ॲड. काळे यांनी संस्थेच्या प्रगतीचा आढावा घेत भविष्यातील योजना मांडल्या. मेळाव्यात कर्जदार, ठेवीदार, अभिकर्ते व संस्थेचे माजी अधिकारी यांचा सत्कार करण्यात आला.

             कार्यक्रमाचे प्रास्ताविक सुरेश बरडे यांनी केले, आभार प्रदर्शन विलास होलगीलवार यांनी केले, तर सूत्रसंचालन अशोक कोरडे यांनी केले. मेळाव्याला मोठ्या संख्येने सभासद उपस्थित होते.