वणीतील रक्तरंजित हत्याकांड! अनैतिक नात्यामुळे झालेला खून उघडकीस

वणी :

            शहरात घडलेली हृदयद्रावक हत्या पोलिसांच्या वेगवान कारवाईने उकलली. २६ वर्षीय स्वप्नील किशोर राऊत याला अनैतिक संबंधाच्या कारणास्तव निर्घृण मारले गेले, तर दोन आरोपी आधीच पोलिसांच्या हाती आहेत.

             दि. २३/१०/२०२५ रोजी सायंकाळी ४:०० वाजता, स्वप्नीलला अज्ञात व्यक्तीने फोन करून पैसे आणायला सांगितले. रात्री ८:०० वाजता त्याचा फोन बंद झाला आणि तो घरात परतला नाही. सकाळी ६:०० वाजता शोध घेतल्यावर मृतदेह वडगाव टीप रोड, गजानन नगरी येथे सापडला. स्वप्नीलच्या गळा व डोक्याला गंभीर मार लागले होते, आणि त्याचा मृतदेह रक्ताच्या थारोळ्यात होता.

       वणी पोलिसांनी तत्काळ गुन्हा नोंदवून तपास सुरु केला. सीसीटीव्ही फुटेज व तांत्रिक तपासाद्वारे स्पष्ट झाले की, स्वप्नील दुपारी ४:३५ वाजता लाल पॅशन प्रो दुचाकीवर दोन व्यक्तींसोबत ब्राम्हणी फाटा चौकातून टोलनाक्याकडे जात होता.

         सखोल चौकशी नंतर पोलिसांनी या हत्येतील दोन मुख्य आरोपींना अटक केली. यामध्ये सुमेश रमेश टेकाम (२४, वडजापूर), सौरभ मारोती आत्रम (२७, वडजापूर) चौकशीत स्पष्ट झाले की ही हत्या अनैतिक संबंधातून केली गेली. वणी पोलिसांच्या कौशल्यपूर्ण तपासामुळे हा गंभीर गुन्हा काही तासांत उकलला.

       पुढील तपास पोउपनि सुदाम आसोरे, पोलीस स्टेशन वणी करत आहेत. आरोपींना अटक, गुन्ह्याची नोंद व चौकशी करत असताना तपासात आणखी तपशील उघडकीस येण्याची शक्यता आहे.