वणी शहरात दिवाळीची लगबग सुरू; बाजारपेठ सजली, नागरिकांच्या खरेदीला जोर

वणी :

            आनंद, प्रकाश आणि ऐक्याचा सण दिवाळी  येऊन ठेपल्याने वणी शहरात सणाचा उत्साह ओसंडून वाहत आहे. शहरातील प्रमुख बाजारपेठा, गल्ली-बोळ आणि चौक दिव्यांनी आणि सजावटींनी उजळून निघाले आहेत. खरेदीसाठी नागरिकांची मोठी गर्दी पाहायला मिळत असून, ग्रामीण भागातूनही ग्राहकांचा ओघ वाढला आहे

         गांधी चौक, बसस्थानक परिसर, राममंदिर रोड, इंदिरा चौक, टिळक चौक या परिसरात व्यापाऱ्यांनी दुकाने दिवे, कंदील, फुलांच्या माळा आणि तोरणांनी सजवली आहेत. कपडे, मिठाई, फटाके, इलेक्ट्रॉनिक वस्तू, दागिने आणि सजावटीच्या वस्तूंची विक्री जोमात सुरू आहे.

             वणी शहरच नव्हे तर परिसरातील मारेगाव, झरी, कायर, दहेगाव, आणि इतर ग्रामीण भागातून शेतकरी व नागरिक कुटुंबासह खरेदीसाठी येत आहेत. बाजारपेठेत भाजी, फळे, मिठाई, सजावटीच्या वस्तू, तसेच फटाके व कपड्यांच्या दुकानांवर ग्रामीण ग्राहकांची रांग लागलेली दिसत आहे. दिवाळीचा फराळ तयार करण्यासाठी लागणाऱ्या साहित्याच्या खरेदीसाठी महिलांची मोठी गर्दी आहे.

          दिवाळी म्हटली की फराळ, मिठाई आणि फटाक्यांशिवाय सण अपूर्णच! शहरातील मिठाई दुकानात ग्राहकांची चांगली गर्दी दिसून येत आहे. लाडू, करंजी, चकली, चिवडा, शंकरपाळे यांसाठी लागणाऱ्या साहित्याची मागणीही वाढली आहे. महिलांनी बाजारपेठेत गर्दी केल्यामुळे किराणा व्यापाऱ्यांची विक्री मोठ्या प्रमाणात वाढली आहे.

          फटाके विक्रेत्यांच्या मते, यंदा मुलांमध्ये फुलजली, झुरमुरे, अनार आणि लहान आकारातील स्फोटक फटाक्यांना मागणी आहे. “आम्ही पर्यावरणपूरक फटाके ठेवले आहेत आणि लोक त्याकडे अधिक आकर्षित होत आहेत,” असे एका विक्रेत्याने सांगितले.

            महिला वर्ग साड्या, लेहेंगा, कुर्ते आणि पारंपरिक पोशाखांच्या खरेदीत व्यस्त आहे, तर तरुणाईला जीन्स, जॅकेट्स आणि फॅन्सी कपड्यांची आवड दिसत आहे. विविध दुकानांनी ‘बाय वन गेट वन’ किंवा १०% ते ५०% सवलत योजना जाहीर केल्या आहेत. तसेच टीव्ही, फ्रिज, वॉशिंग मशीन, मोबाइल आणि इतर घरगुती उपकरणांवर आकर्षक सवलती मिळत असल्याने इलेक्ट्रॉनिक शोरूममध्येही खरेदीची लगबग आहे.

        वाढत्या गर्दीचा विचार करून पोलिस प्रशासनाने वाहतूक नियंत्रणासाठी विशेष उपाययोजना केल्या आहेत. शहराच्या मुख्य रस्त्यांवर वाहतूक पोलीस तैनात करण्यात आले. “सणाच्या काळात नागरिकांनी संयम बाळगावा, वाहतूक नियमांचे पालन करावे, तसेच पार्किंग ठिकाणांवरच वाहन लावावे,” असे वाहतूक पोलिसांनी आवाहन केले.

         रात्रीच्या वेळी संपूर्ण वणी शहर रोषणाईने उजळून निघते. प्रत्येक घर, दुकान आणि मंदिर दिव्यांनी, कंदिलांनी आणि रंगोळ्यांनी सजलेले दिसते. रस्त्यांवर दिव्यांची माळ लावण्यात आली असून, मुलांचे गट फटाके फोडत सणाचा आनंद घेत आहेत. वणी शहर आता दिवाळीच्या प्रकाशात न्हाऊन निघाले असून, सर्वत्र आनंद, उत्साह आणि ऐक्याचे वातावरण पसरले आहे.