पतसंस्था कर्जदारांच्या हक्कांसाठी आयटकचा एल्गार, ७ सप्टेंबरला मारेगावात ठिय्या

 

मारेगाव : 

         पतसंस्था कर्जदार सभासदांच्या विविध मागण्यांसाठी आयटक संलग्न लाल बावटा पतसंस्था सभासद संघटना, महाराष्ट्र राज्य, ता. मारेगाव, जि. यवतमाळ यांच्या वतीने सोमवार, ७ सप्टेंबर २०२६ रोजी दुपारी १२ वाजता मारेगाव तहसील कार्यालयासमोर एकदिवसीय ठिय्या आंदोलन करण्यात येणार आहे.

       पतसंस्थांकडून कर्जदार सभासदांची होत असल्याचा आरोप असलेली आर्थिक वसुली, वाढते व्याज आणि न्यायालयीन कारवाईच्या प्रश्नांकडे शासन व सहकार विभागाने तातडीने लक्ष द्यावे, अशी मागणी संघटनेने केली आहे.

        पतसंस्था कर्जदार सभासदांना चेक बाऊन्स प्रकरणातील कलम १३८ पासून संरक्षण द्यावे, न्यायालयात सुरू असलेल्या कर्जविषयक प्रकरणांमध्ये सहकार कायद्यात आवश्यक बदल करून कर्जफेडीसाठी हप्त्यांची सुविधा उपलब्ध करून द्यावी, २० टक्के व्याजाने कर्जवसुली बंद करावी, तसेच कर्ज घेताना कपात करण्यात येणाऱ्या शेअर्सच्या रकमेसंदर्भात योग्य तो निर्णय घ्यावा, अशा प्रमुख मागण्या संघटनेने केल्या आहेत.

         याशिवाय फौजदारी खटले व चेक बाऊन्स प्रकरणांमध्ये कर्जदार सभासदांना संरक्षण द्यावे आणि नैसर्गिक आपत्तीमुळे आर्थिक अडचणीत आलेल्या शेतकरी, शेतमजूर व इतर कर्जदारांची कर्जे माफ करण्याबाबत शासनाने निर्णय घ्यावा, अशी मागणीही करण्यात आली आहे.

           मारेगाव तालुक्यातील पतसंस्थांच्या कर्जवसुली प्रक्रियेबाबत सभासदांमध्ये नाराजी असल्याचा दावा संघटनेने केला आहे. कर्ज घेताना शेअर्सची रक्कम कपात करणे, मालमत्ता गहाण ठेवणे आणि हमी म्हणून धनादेश घेणे यामुळे कर्जदारांवर आर्थिक दबाव वाढत असल्याचे संघटनेचे म्हणणे आहे.

          या प्रश्नांवर यापूर्वी संबंधित सहकार विभागातील अधिकारी, जिल्हाधिकारी आणि इतर प्रशासकीय अधिकाऱ्यांकडे निवेदने देण्यात आली असल्याचे संघटनेने सांगितले. मात्र, अपेक्षित तोडगा न निघाल्याने आता आंदोलनाचा मार्ग स्वीकारण्यात येत असल्याचे निवेदनात नमूद करण्यात आले आहे.

     शासनाने कर्जदार सभासदांच्या मागण्यांवर सकारात्मक निर्णय घेऊन कर्जवसुलीची प्रक्रिया अधिक पारदर्शक व न्याय्य करावी, अशी मागणी संघटनेने केली आहे.

        दरम्यान, ७ सप्टेंबर रोजी दुपारी १२ वाजता मारेगाव तहसील कार्यालयासमोर होणाऱ्या ठिय्या आंदोलनात तालुक्यातील कर्जदार सभासद, शेतकरी, व्यापारी, शेतमजूर व इतर सभासदांनी मोठ्या संख्येने सहभागी व्हावे, असे आवाहन आयटक संलग्न लाल बावटा पतसंस्था सभासद संघटना महाराष्ट्र राज्य यांच्या वतीने करण्यात आले आहे.