नितीन गडकरींच्या हस्ते ‘लोकरंगभूमी आणि लोकवाङ्मय’ गौरवग्रंथाचे प्रकाशन

 नागपूर :  

     लोककलेच्या समृद्ध परंपरेला आपल्या सर्जनशील प्रतिभेने नवे आयाम देणारे प्रख्यात लोककलावंत व दिग्दर्शक प्रा. डॉ. दिलीप अलोणे यांच्या प्रदीर्घ कलासाधनेचा गौरव करणाऱ्या ‘लोकरंगभूमी आणि लोकवाङ्मय’ या गौरवग्रंथाचे प्रकाशन केंद्रीय भूपृष्ठ वाहतूक मंत्री नितीन गडकरी यांच्या हस्ते शनिवारी (२२ ऑगस्ट) नागपुरात उत्साहपूर्ण आणि भावपूर्ण वातावरणात झाले.

      लोकपरंपरा, लोककला, लोकनाट्य आणि लोकवाङ्मय यांच्या संवर्धनासाठी आयुष्यभर केलेल्या डॉ. अलोणे यांच्या योगदानाचा वेध घेणारा हा गौरवग्रंथ त्यांच्या कलाप्रवासाची नोंद घेणारा महत्त्वपूर्ण दस्तऐवज ठरणार आहे. लोककलेच्या क्षेत्रात त्यांनी केलेल्या प्रदीर्घ आणि उल्लेखनीय कार्याचा गौरव या निमित्ताने करण्यात आला.

      समारंभाच्या प्रारंभी डॉ. दिलीप अलोणे यांनी गणेशमूर्ती प्रदान करून नितीन गडकरी यांचा सत्कार केला. यावेळी डॉ. अलोणे यांच्या कलाक्षेत्रातील कार्यकर्तृत्वाचा गौरवपूर्ण उल्लेख करताना गडकरी यांनी त्यांच्या लोककलेवरील निष्ठेचे कौतुक केले. लोककलावंतांच्या कार्याचा दस्तऐवज पुढील पिढ्यांपर्यंत पोहोचणे आवश्यक असून, ‘लोकरंगभूमी आणि लोकवाङ्मय’ हा गौरवग्रंथ त्यादृष्टीने अत्यंत मोलाचा ठरेल, असा विश्वास त्यांनी व्यक्त केला.

       लोककला आणि लोकवाङ्मयाचा अभ्यास करणाऱ्या विद्यार्थ्यांपासून संशोधकांपर्यंत अनेकांसाठी हा ग्रंथ उपयुक्त संदर्भसाहित्य ठरेल. डॉ. दिलीप अलोणे यांच्या कलासाधनेबरोबरच लोकपरंपरेच्या विविध पैलूंचा अभ्यास करण्यासाठी हा गौरवग्रंथ निश्चितच महत्त्वाचा ठेवा ठरेल, असेही गडकरी यांनी नमूद केले.

      डॉ. मनोहर सुरवाडे आणि डॉ. उन्नती चौधरी यांनी या गौरवग्रंथाचे संपादन केले असून, विजय प्रकाशन, नागपूर यांनी त्याचे प्रकाशन केले आहे. डॉ. अलोणे यांच्या कलाप्रवासाचे विविध पैलू, लोककलेशी असलेले त्यांचे नाते आणि त्यांच्या कार्याचा सांस्कृतिक ठसा या ग्रंथातून अधोरेखित करण्यात आला आहे.

       या हृद्य समारंभाला ज्येष्ठ पत्रकार शैलेश पांडे, श्रीपाद अपराजित, बाळासाहेब कुळकर्णी, डॉ. अनिकेत अलोणे, वणी प्रेस वेल्फेअर असोसिएशनचे अध्यक्ष अनिल बिलोरिया, कल्पित भवाळकर, मनोज ढुमे, आशुतोष यादव यांच्यासह साहित्य, पत्रकारिता आणि लोककला क्षेत्रातील मान्यवर उपस्थित होते.

        लोककलेची मुळे जपताना तिच्या विविध आविष्कारांना व्यापक व्यासपीठ मिळवून देणाऱ्या डॉ. दिलीप अलोणे यांच्या कार्याचा गौरव करणारा हा ग्रंथ म्हणजे त्यांच्या दीर्घ कलासाधनेला दिलेली सन्मानाची अक्षरओंजळ ठरली आहे.