मारेगावात शेतकऱ्यांना हादरा, ट्रॅक्टर व अवजारे चोरी

मारेगाव :

‎                 तालुक्यातील मारेगाव शेतशिवारात दिवसाढवळ्या ट्रॅक्टरसह शेती अवजारे लंपास झाल्याची धक्कादायक घटना उघडकीस आली आहे. या प्रकरणी सागर सुरेश आवारी (वय अंदाजे 35) व त्याचे वडील सुरेश आवारी (वय अंदाजे 70, रा. मारेगाव वार्ड क्र. 05) यांच्यावर गुन्हा दाखल करण्यात आला आहे.

‎

‎                 फिर्यादी सौ. बेबीताई कुर्मदास काळे (वय 73, रा. बल्लारपूर) यांनी मारेगाव पोलीस ठाण्यात दिलेल्या तक्रारीनुसार, त्यांच्या मालकीची शेतजमीन गट क्रमांक 254 मध्ये असून शेतीकामासाठी त्यांनी स्वतःचा ट्रॅक्टर (MH 29 V 3463) मागील दोन वर्षांपासून आरोपींकडे ठेक्यावर दिला होता. मात्र 1 एप्रिल 2026 पासून त्यांनी शेती व ट्रॅक्टर परत घेत संबंध तोडले होते.

‎

‎                दरम्यान, 9 एप्रिल रोजी दुपारी सुमारास फिर्यादी आपल्या पती व मुलासह शेतात गेल्या असता, शेतात ठेवलेला ट्रॅक्टर तसेच शेतीची महत्त्वाची अवजारे गायब असल्याचे लक्षात आले. यामध्ये ट्रॅक्टर, पाण्याच्या मोटरची साधने, चैन बॉक्स, कल्टिवेटर आणि ‘व्ही फास’ अशी साधने मिळून सुमारे 1 लाख 90 हजार रुपयांचा माल चोरीला गेला आहे.

‎

‎            स्थानिक साक्षीदाराने आरोपी हा ट्रॅक्टर घेऊन जाताना दिसल्याचे सांगितल्याने संशय अधिक बळावला आहे. या प्रकरणी मारेगाव पोलिसांनी भा.न्या.सं. कलम 303(2), 3(5) अंतर्गत गुन्हा नोंद करून तपास सुरू केला आहे.

‎

‎           या घटनेमुळे परिसरात एकच खळबळ उडाली असून “विश्वासाने दिलेला ट्रॅक्टरच चोरीला जाणे” हा प्रकार शेतकऱ्यांसाठी मोठा धक्का मानला जात आहे. पुढील तपास पोलीस हवालदार शंकर बारेकर करत आहेत.