मूलबाळ नसल्याने, पत्नीचा मानसिक व शारीरिक छळ ; शिक्षक पतीसह चौघांवर केस

यवतमाळ :

‎                विवाहितेला मूलबाळ नसल्याच्या कारणावरून मानसिक व शारीरिक छळ करून घराबाहेर काढल्याप्रकरणी यवतमाळ शहर पोलिसांनी पती, सासू, दिर आणि जाऊ यांच्याविरुद्ध गुन्हा दाखल केला आहे.

‎

‎         या प्रकरणातील आरोपींमध्ये प्रशांत ज्ञानदेव साठे, बेबीताई ज्ञानदेव साठे, प्रविण ज्ञानदेव साठे आणि अश्विनी प्रविण साठे ( ता. जि. अकोला) यांचा समावेश आहे.

‎

‎        पोलिसांनी दिलेल्या माहितीनुसार, संबंधित महिलेचा विवाह २०१९ मध्ये प्रशांत साठे यांच्यासोबत झाला होता. विवाहानंतर सुरुवातीचे काही महिने सर्व काही सुरळीत सुरू होते. मात्र त्यानंतर घरगुती कारणांवरून वारंवार वाद घालत पती व सासरच्या मंडळींकडून मानसिक त्रास दिला जात असल्याचा आरोप करण्यात आला आहे.

‎

‎         तक्रारीनुसार, पती प्रशांत साठे हे वारंवार माहेरहून पैसे आणण्याचा तगादा लावत होते. तसेच लग्नाला अनेक वर्षे होऊनही मूलबाळ नसल्याने सासू बेबीताई साठे, दिर प्रविण साठे व जाऊ अश्विनी साठे हे महिलेला “वांझोटी” म्हणत अपमानास्पद वागणूक देत असल्याचे फिर्यादीत नमूद आहे.

‎

‎        ७ ऑगस्ट २०२५ रोजी घरातील कामाच्या कारणावरून वाद निर्माण झाला. त्यावेळी पतीने शिवीगाळ करून मारहाण केल्याचा आरोप आहे. सततच्या मानसिक व शारीरिक छळाला कंटाळून संबंधित महिला रक्षाबंधनानिमित्त माहेरी यवतमाळ येथे भावाकडे राहण्यासाठी आल्याचे सांगण्यात आले. त्यानंतर आरोपींनी तिला परत नेण्यासाठी कोणतीही पुढाकार घेतला नसल्याचेही तक्रारीत म्हटले आहे.

‎

‎       दरम्यान, राज्य महिला आयोगामार्फत पंचायत समिती नेर येथे समुपदेशन प्रक्रिया पार पडली होती. ५ जानेवारी २०२६ रोजी समझोता झाल्यानंतरही आरोपींनी “तुला नांदवणार नाही” असे सांगत शिवीगाळ केली व जीवे मारण्याची धमकी दिल्याचा आरोप करण्यात आला आहे.

‎

‎           यानंतर संबंधित महिलेने यवतमाळ शहर पोलिसांत तक्रार दिली. पोलिसांनी प्रकरण समेटासाठी भरोसा सेलमध्ये पाठविले होते. मात्र तेथेही समेट न झाल्याने अखेर चारही आरोपींविरुद्ध विविध कलमान्वये गुन्हा दाखल करण्यात आला असून पुढील तपास सुरू आहे.