‎“सीसीटीव्हीला चकवा की आतली माहिती ? वणी उपकेंद्रातील चोरी गूढ”

वणी :

‎           शहरातील 220 के.व्ही. उपकेंद्रात अज्ञात चोरट्यांनी थेट कुंपण कापून आत घुसत मोठी चोरी केल्याची धक्कादायक घटना समोर आली आहे. या घटनेत तब्बल 9 कॉपर अर्थिंग रॉड लंपास करण्यात आले असून सुमारे 1 लाख 35 हजार रुपयांचे नुकसान झाले आहे. विशेष म्हणजे, ही चोरी सुरक्षा व्यवस्थेच्या नाकावर टिच्चून झाल्याने संताप व्यक्त होत आहे.

‎

‎             माहितीनुसार, 2 फेब्रुवारी 2026 रोजी सकाळी नियमित पाहणीदरम्यान 220 के.व्ही. पांढरकवडा, चंद्रपूर आणि वरोरा लाईनवरील प्रत्येकी 3 असे एकूण 9 कॉपर रॉड गायब असल्याचे आढळले. तपासात चोरट्यांनी उपकेंद्राचे तारांचे कुंपण कापून निर्भयपणे आत प्रवेश केल्याचे स्पष्ट झाले. त्यानंतर आयसोलेटरला जोडलेले मौल्यवान कॉपर रॉड उचलून ते पसार झाले.

‎

‎           या घटनेत सर्वात गंभीर बाब म्हणजे रात्रीच्या पाळीत असलेल्या सुरक्षा रक्षकांकडून झालेला कथित हलगर्जीपणा. एवढ्या संवेदनशील ठिकाणी चोरी होणे ही सुरक्षा व्यवस्थेची मोठी चूक असल्याचे बोलले जात आहे.

‎

‎          उपकार्यकारी अभियंता विनोद शेंडे यांनी वणी पोलीस ठाण्यात तक्रार अर्ज दाखल करून भारतीय विद्युत अधिनियम 2003 च्या कलम 135 व 136 अंतर्गत गुन्हा नोंदवण्याची मागणी केली आहे. या प्रकरणी संबंधितांवर कडक कारवाई व सखोल चौकशीची मागणी जोर धरत आहे.

‎

‎          दरम्यान, या धाडसी चोरीमुळे वणी परिसरातील वीज सुरक्षेवर प्रश्नचिन्ह निर्माण झाले असून नागरिकांमध्ये तीव्र नाराजी पसरली आहे. पोलीस प्रशासनाने तातडीने कारवाई करून चोरट्यांना अटक करावी, अशी मागणी जोर धरत आहे.