अंधाऱ्या गल्लीतील खेळ संपवायला पोलिसांचा उजेड

वणी  : 

‎             शहरातील वाढत्या अवैध जुगार व्यवसायाला आळा घालण्यासाठी वणी पोलीस प्रशासनाने 1 जानेवारी 2026 पासून विशेष मोहीम हाती घेतली असून या मोहिमेला उल्लेखनीय यश मिळाले आहे. शहरातील विविध भागांत गुप्त माहितीच्या आधारे सातत्याने छापे टाकून जुगार अड्ड्यांवर कठोर कारवाई करण्यात येत आहे. या कालावधीत एकूण 53 गुन्हे जुगार कायद्यांतर्गत नोंदविण्यात आले असून 3,51,650 रुपयांचा मुद्देमाल जप्त करण्यात आला आहे.

‎

‎          पोलीसांनी सिंधी कॉलनी, एकता नगर, भाजी मंडी, दीपक चौपाटी, लालगुडा परिसर यांसारख्या संवेदनशील भागांवर विशेष लक्ष केंद्रित केले. या ठिकाणी लपून-छपून सुरू असलेल्या जुगार अड्ड्यांवर अचानक धाडी टाकून अनेक आरोपींना ताब्यात घेण्यात आले. कारवाईदरम्यान रोख रक्कम, पत्ते, जुगारासाठी वापरले जाणारे साहित्य तसेच अन्य संबंधित वस्तू जप्त करण्यात आल्या आहेत. काही ठिकाणी रात्री उशिरापर्यंत सुरू असलेल्या जुगार सत्रांवरही पोलिसांनी यशस्वीरीत्या कारवाई केली.

‎

‎           या मोहिमेसाठी पोलीस विभागाने विशेष पथके तयार करून त्यांना वेगवेगळ्या भागांत नियुक्त केले आहे. स्थानिक सूत्रांकडून मिळालेल्या माहितीच्या आधारे तसेच गुप्त पाळत ठेवून ही कारवाई करण्यात येत आहे. त्यामुळे जुगार अड्डे चालवणाऱ्यांमध्ये भीतीचे वातावरण निर्माण झाले असून अनेकांनी आपले बेकायदेशीर धंदे बंद केल्याचे दिसून येत आहे.

‎

‎        वणी पोलीसांचे म्हणणे आहे की, अवैध जुगारामुळे समाजात गुन्हेगारी प्रवृत्ती वाढण्यास चालना मिळते, तसेच अनेक कुटुंबांची आर्थिक परिस्थिती ढासळते. त्यामुळे अशा प्रकारांवर कठोर कारवाई करणे आवश्यक आहे. या पार्श्वभूमीवर पोलीस प्रशासनाने ही मोहीम अधिक व्यापक करण्याचा निर्णय घेतला आहे.

‎

‎         पुढील काळातही ही मोहीम अधिक तीव्रतेने राबविण्यात येणार असून, शहर व परिसरात सातत्याने छापे टाकले जाणार आहेत. नागरिकांनी देखील सामाजिक जबाबदारी ओळखून अशा बेकायदेशीर प्रकारांची माहिती पोलिसांना द्यावी, असे आवाहन पोलीस निरीक्षक, पोलीस स्टेशन वणी यांनी केले आहे.