वणी :
येथे भारतीय जनता पार्टीतर्फे आयोजित ‘पंडित दीनदयाल उपाध्याय प्रशिक्षण महाअभियान २०२६’ अंतर्गत वणी शहर मंडळाचा दोन दिवसीय निवासी प्रशिक्षण वर्ग उत्साहात पार पडला. वसंत जिनिंग हॉल येथे झालेल्या या शिबिरात अपेक्षित १०५ समर्पित कार्यकर्त्यांनी सक्रिय सहभाग नोंदवला.
कार्यक्रमाचे उद्घाटन जिल्हाध्यक्ष प्रफुल चव्हाण, माजी आमदार संजीवरेड्डी बोदकुरवार, माजी जिल्हाध्यक्ष तारेंद्र बोर्डे, नगराध्यक्ष विद्या आत्राम आदी मान्यवरांच्या उपस्थितीत झाले. कार्यकर्ता हा पक्षाचा कणा असून त्याला वैचारिकदृष्ट्या सक्षम करणे हा या प्रशिक्षणाचा मुख्य उद्देश असल्याचे यावेळी नमूद करण्यात आले.
दोन दिवसांत एकूण ७ सत्रांचे आयोजन करण्यात आले होते. यात पक्षाचा इतिहास व विकास, कार्यपद्धती, कार्यविस्तार, वैचारिक अधिष्ठान, सोशल मीडिया व एआयचा वापर, सरकारची कामगिरी आणि बूथ व्यवस्थापन अशा महत्त्वपूर्ण विषयांवर तज्ज्ञांनी मार्गदर्शन केले.
सध्याच्या डिजिटल युगाचा विचार करून सत्रांनंतर ऑनलाइन परीक्षा घेण्यात आली. परीक्षेत यशस्वी ठरलेल्या कार्यकर्त्यांना मान्यवरांच्या हस्ते डिजिटल प्रमाणपत्र देऊन गौरविण्यात आले. योगासन सत्र व सांस्कृतिक कार्यक्रमांमुळे शिबिरात उत्साहाचे वातावरण निर्माण झाले.
या उपक्रमाच्या यशस्वीतेसाठी शहर मंडळ अध्यक्ष ॲड. निलेश चौधरी, संयोजक आशिष डंभारे व संपूर्ण टीमने विशेष परिश्रम घेतले. या प्रशिक्षणातून मिळालेल्या ज्ञानाच्या बळावर कार्यकर्ते आगामी काळात ‘राष्ट्र प्रथम’ या विचाराने जनतेपर्यंत पोहोचण्यासाठी सज्ज झाले आहेत.
टिप्पणी पोस्ट करा
0 टिप्पण्या