शहरालगतच्या लालगुडा गावातील स्मशानभूमीजवळील दुमजली इमारतीत सुरू असलेल्या बनावट देशी दारू कारखान्यावर राज्य उत्पादन शुल्क विभागाने बुधवारी दुपारी धाड टाकली. या कारवाईत सुमारे २ लाख ७३ हजार रुपयांचा मुद्देमाल जप्त करण्यात आला असून परिसरात खळबळ उडाली आहे.
झडतीदरम्यान ‘रूपेश संत्रा’ ब्रँडचे बनावट स्टिकर लावलेल्या ९० मिलीच्या ३६०० शिश्या (अंदाजे किंमत १.६२ लाख रुपये) आढळून आल्या. तसेच रिकाम्या बाटल्या, झाकण, प्लास्टिक ड्रम, पॅकिंग साहित्य आणि दोन दुचाकी व एक मोपेड जप्त करण्यात आली.
कारवाईदरम्यान सूरज लोडे (रा. वेळाबाई) याला ताब्यात घेण्यात आले. चौकशीत त्याने कारखाना श्याम भरत मेश्राम याचा असल्याची माहिती दिली. मात्र मुख्य आरोपी मेश्राम हा कुटुंबासह फरार झाला आहे.
ही कारवाई उत्पादन शुल्क निरीक्षक पी. एस. बोढारे (पांढरकवडा), भरारी पथक प्रभारी निरीक्षक डी. एस. त्रिपाठी, उपनिरीक्षक एस. एल. बोढेवार, एस. एम. बुटले तसेच यवतमाळ येथील उपनिरीक्षक डी. डी. वाळके व त्यांच्या सहकाऱ्यांनी संयुक्तरीत्या पार पाडली.
टिप्पणी पोस्ट करा
0 टिप्पण्या