वणी शहर भाजपमध्ये दिनांक १२ जानेवारीला जे घडले आहे, ते सौम्य शब्दांत मांडण्याची गरजच उरलेली नाही. कारण हा निर्णय सूचक नाही, तो थेट, कठोर आणि अंतिम आहे.
नगराध्यक्षांच्या शपथविधी कार्यक्रमादरम्यान विश्रामगृह येथे झालेली बैठक ही समेटाची नव्हती, तर सीमा आखणारी बैठक होती. जिल्हाध्यक्ष चव्हाण, आमदार बोदकुरवार यांच्या उपस्थितीत दिलेला संदेश इतका स्पष्ट होता की, त्याचा चुकीचा अर्थ काढण्याचीही जागा ठेवण्यात आली नाही. वणी शहर भाजपमध्ये संघटनात्मक प्रमुख कोण, निर्णयाचा अंतिम अधिकार कुणाकडे आणि जबाबदारी कोणाची—हे सर्व आज एका वाक्यात ठरवण्यात आले. शहराध्यक्ष अँड. निलेश चौधरी यांचा शब्द ऐकला नाही, तर तो पक्षविरोधी कृत्य मानले जाईल, इतका कठोर अर्थ या आदेशात दडलेला आहे.
खरे पाहता, हा निर्णय कोणाच्या विरोधात नाही, तर पक्षाच्या अस्तित्वासाठी आहे. काही जणांनी पद मिळाल्यानंतर संघटना विसरणे, वरिष्ठांना डावलणे आणि “आपणच सर्वेसर्वा” असल्याचा अविर्भाव आणणे, ही भाजपची संस्कृती नाही. भाजपमध्ये शिस्त ही निवड नसून अट आहे. आणि ही अट मोडली जात असल्याचे स्पष्ट दिसताच वरिष्ठांनी वेळ न दवडता सत्ता केंद्र एकवटण्याचा निर्णय घेतला.
निलेश चौधरी यांच्याकडे ही जबाबदारी देण्यात आली, कारण ते सोयीचे नाव नाही, तर गरजेचे नेतृत्व आहे. गटबाजीला खतपाणी घालणारे नव्हे, तर गट संपवणारे नेतृत्व आज वणीला हवे होते. बोलघेवडे नव्हे, तर निर्णय घेणारे; तडजोडीचे राजकारण करणारे नव्हे, तर संघटनेची रेघ ओढणारे नेतृत्व आज पक्षाला आवश्यक होते. चौधरी यांनी ते आधीच कृतीतून दाखवले आहे. त्यामुळेच वरिष्ठांचा विश्वास त्यांच्यावर केंद्रीत झाला.
महत्त्वाची बाब म्हणजे, SK News Channel ने यापूर्वीच वणी शहर भाजपमधील सत्तासूत्रे निलेश चौधरी यांच्या हातात जाणार, हे ठामपणे मांडले होते. तेव्हा काहींनी ते अफवा म्हणून उडवून लावले, तर काहींनी ती बातमी अंगावर घेतली. आज मात्र वास्तवाने सर्व शंका संपवल्या आहेत. ती बातमी अंदाज नव्हती, तर येणाऱ्या राजकीय भूकंपाची सूचना होती.
या निर्णयामुळे जे अस्वस्थ झाले आहेत, त्यांची अस्वस्थता समजण्यासारखी आहे. कारण शिस्त आली की, स्वैराचार संपतो. नियम आले की, मनमानी थांबते. आणि नेतृत्व ठरले की, आडमार्ग बंद होतात. भाजपमध्ये राहायचे असेल, तर संघटनेत राहावे लागेल—स्वतःच्या गटात नाही. हा संदेश आता अप्रत्यक्ष नाही, तर उघड आहे.
आजपासून वणी शहर भाजपमध्ये कुठलीही गोष्ट “आपल्या सोयीने” होणार नाही. नगरपरिषद असो, विकासकामे असोत किंवा राजकीय भूमिका—सर्व काही एकाच दिशेने, एकाच नेतृत्वाखाली चालेल. चर्चा होतील, मत मांडली जातील, पण अंतिम शब्द एकच असेल.
आणि तो शब्द कोणाचा असेल, याबाबत आता कोणताही संभ्रम उरलेला नाही. वणी शहर भाजपमध्ये आता सत्ता विखुरलेली नाही. ती एकवटली आहे. आणि ती अँड. निलेश चौधरी यांच्या हातात आहे.
टिप्पणी पोस्ट करा
0 टिप्पण्या