वणीमध्ये दिवसाढवळ्या 70 हजारांची हॅन्डबॅग चोरी

वणी :

‎          शहरात दिवसाढवळ्या चोरीची धक्कादायक घटना घडली असून, स्टेट बँक ऑफ इंडियामधून पैसे काढून घरी जात असलेल्या WCL कर्मचाऱ्याची 70 हजार रुपयांची हॅन्डबॅग अज्ञात चोरट्याने लंपास केल्याची घटना मंगळवारी सायंकाळी घडली.

‎

‎        राजेश नानाजी चौधरी (वय 59), रा. भोंगळे लेआउट, वणी, हे WCL रेल्वे सायडिंग येथे नोकरीस आहेत. मंगळवारी सायंकाळी 4 वाजताच्या सुमारास त्यांनी स्टेट बँक ऑफ इंडिया, वणी शाखेतून रोख 70,000 रुपये काढले होते. या रकमेमध्ये 500 रुपयांच्या 80 नोटा व 200 रुपयांच्या 150 नोटा होत्या. ही रक्कम त्यांनी “अभिनंदन ज्वेलर्स” असे नाव असलेल्या हॅन्डबॅगमध्ये ठेवून ती बॅग मोटारसायकल(MH-34-AF-3363) च्या हॅन्डलला अडकवली होती.

‎

‎       SBI बँकेतून आवारी लेआउटकडे जात असताना जटाशंकर चौकाजवळ पांडे मोबाईल शॉपी समोर एका अनोळखी इसमाने त्यांना थांबवून मोटारसायकलच्या मागील सीटवर घाण लागल्याचे सांगितले. मात्र रस्त्यावर वाहतूक असल्याने ते न थांबता भाजीमंडीतील जामनगरी दुकानाजवळ मोटारसायकल उभी करून खाली उतरले.

‎

‎     घाण साफ करण्यासाठी समोरील किराणा दुकानातून पेपर आणण्यासाठी गेले असता, काही क्षणांतच मोटारसायकलला अडकवलेली पैशांची बॅग चोरीस गेल्याचे त्यांच्या लक्षात आले. त्यांनी आजूबाजूला शोध घेतला मात्र बॅग मिळून आली नाही.

‎

‎       या प्रकरणी वणी पोलीस ठाण्यात तक्रार दाखल करण्यात आली असून भारतीय न्याय संहिता (BNS) 2023 कलम 303(2) अन्वये अज्ञात आरोपीविरुद्ध गुन्हा नोंद करण्यात आला आहे. पोलीस पुढील तपास करीत आहेत.

‎        दिवसाढवळ्या झालेल्या या चोरीमुळे वणी शहरात खळबळ उडाली असून, बँकेतून पैसे काढणाऱ्या नागरिकांच्या सुरक्षेचा प्रश्न पुन्हा ऐरणीवर आला आहे.