सुशगंगा तंत्रनिकेतनचा दिमाखदार निकाल; गुणवत्ता शिक्षणाची परंपरा अधोरेखित

वणी–

       नायगांव येथील सुशगंगा तंत्रनिकेतन महाविद्यालयाने MSBTB Winter 2025 परीक्षेत पुन्हा एकदा उत्कृष्ट निकालाची परंपरा कायम राखत शैक्षणिक क्षेत्रात आपले वेगळे स्थान अधोरेखित केले आहे. सातत्य, शिस्त आणि गुणवत्तेच्या जोरावर महाविद्यालयातील विद्यार्थ्यांनी उल्लेखनीय यश संपादन केले असून संस्थेच्या अध्यापन पद्धतीची प्रभावीता पुन्हा सिद्ध झाली आहे.

     या परीक्षेत बिपशा रामटेक (८८.०८%) हिने सर्वोच्च कामगिरी करत प्रथम क्रमांक पटकावला. तिच्या पाठोपाठ प्रथमेश मरतवार (८४.३५%), मानषी आदेवार (८३.००%), वैभवि भोयर (८२.८४%), प्रियांशु मोगरे (८२.७१%) आणि जान्हवी पदलमवार (८२.००%) यांनी उल्लेखनीय यश मिळवले. या गुणवंत विद्यार्थ्यांनी महाविद्यालयाच्या यशात मानाचा तुरा खोवला आहे.

       या यशामागे महाविद्यालयाची गुणवत्तापूर्ण अध्यापन पद्धती, आधुनिक तंत्रज्ञानाधारित शिक्षण, नियमित वर्ग व सातत्यपूर्ण सराव हे महत्त्वाचे घटक ठरले आहेत. केवळ अभ्यासक्रम पूर्ण करण्यावर न थांबता संकल्पनात्मक स्पष्टता व प्रत्यक्ष उपयोगावर दिला जाणारा भर विद्यार्थ्यांच्या यशाचा कणा ठरला आहे.

       महाविद्यालयाच्या प्राचार्या पुष्पाराणी मॅडम यांच्या कुशल नेतृत्वाखाली दिलेल्या मार्गदर्शक सूचना, वेळोवेळी घेतलेले शैक्षणिक आढावे तसेच विद्यार्थ्यांवर दिलेले वैयक्तिक लक्ष हे या निकालामागील निर्णायक घटक ठरले असल्याचे मत व्यक्त करण्यात येत आहे.

       या उल्लेखनीय यशाबद्दल महाविद्यालयाचे अध्यक्ष प्रदीप बोनगिरवार व उपाध्यक्ष मोहन बोनगिरवार यांनी सर्व गुणवंत विद्यार्थ्यांचे अभिनंदन करत त्यांच्या पुढील शैक्षणिक वाटचालीस शुभेच्छा दिल्या. सुशगंगा तंत्रनिकेतन महाविद्यालयाचा हा निकाल म्हणजे गुणवत्तेवर आधारित शिक्षण व्यवस्थेचा ठोस प्रत्यय असल्याचे मत सर्व स्तरातून व्यक्त होत आहे.