वणी :
भारतीय खाण ब्युरोच्या मार्गदर्शनाखाली आरसीसीपीएल प्रायव्हेट लिमिटेड (एमपी बिरला ग्रुप) यांच्या वतीने आयोजित ३६ वा खाण पर्यावरण आणि खनिज संवर्धन आठवडा (२०२५–२६) चा समारोप व पुरस्कार समारंभ ४ जानेवारी २०२६ रोजी नागपूर येथील रेजेन्टा सेंट्रल हॉटेलमध्ये उत्साहात पार पडला.
या कार्यक्रमाचे प्रमुख पाहुणे भारतीय खाण ब्युरो, नागपूरचे महासंचालक श्री. पंकज कुलश्रेष्ठ होते. कार्यक्रमाचे सह-अध्यक्ष आरसीसीपीएल प्रायव्हेट लिमिटेडचे उत्पादन व प्रकल्प प्रमुख श्री. रजत कुमार प्रुस्टी आणि आयबीएम, नागपूरचे मुख्य खाण नियंत्रक डॉ. वाय. जी. काळे होते. आयबीएम, नागपूरचे खाण नियंत्रक (मध्यवर्ती क्षेत्र) श्री. पी. के. भट्टाचार्य हे सन्माननीय पाहुणे म्हणून उपस्थित होते.
कार्यक्रमाची सुरुवात दीपप्रज्वलन व वंदे मातरम् गायनाने झाली. स्वागत भाषण आरसीसीपीएल प्रायव्हेट लिमिटेडचे उपाध्यक्ष व खाण प्रमुख तसेच एमईएमसी सप्ताहाचे सचिव श्री. कृष्णकुमार राठोड यांनी केले. त्यांनी “स्वावलंबी भारताचे सार, खनिज उत्खननाचा पाया” ही या वर्षाची संकल्पना स्पष्ट केली.
आरसीसीपीएलचे वरिष्ठ उपाध्यक्ष (खनन) श्री. सूरज गुप्ता यांनी खनिज संवर्धन, पर्यावरण संरक्षण व उद्योगातील समन्वय ही एमईएमसी सप्ताहाची प्रमुख उद्दिष्टे सांगितली. आरसीसीपीएलचे युनिट प्रमुख व एमईएमसी सप्ताहाचे अध्यक्ष श्री. जयंत कांडपाल यांनी शाश्वत खाणकामासाठी अशा उपक्रमांचे महत्त्व अधोरेखित केले.
आयबीएम नागपूरचे उपखाण नियंत्रक व कार्यालय प्रभारी श्री. जी. राम यांनी नागपूर विभागातील एकूण ५० खाणींच्या सहभागाची माहिती दिली. श्री. पी. के. भट्टाचार्य यांनी खाण उद्योगातील सामाजिक वनीकरण, वृक्षारोपण व कमी दर्जाच्या खनिजांच्या वापरावर प्रकाश टाकला. डॉ. वाय. जी. काळे यांनी जागतिक अर्थव्यवस्थेत खनिज संसाधनांची भूमिका स्पष्ट केली.
प्रमुख पाहुणे श्री. पंकज कुलश्रेष्ठ यांनी खाण उत्पादन वाढीसोबत पर्यावरण संरक्षण आवश्यक असल्याचे नमूद करत सर्व पुरस्कार विजेत्यांचे अभिनंदन केले. नागपूर विभागातील विविध खाणींना मान्यवरांच्या हस्ते पुरस्कार प्रदान करण्यात आले. कार्यक्रमात सांस्कृतिक सादरीकरण झाले असून आरसीसीपीएलचे श्री. सुमंत धनोडकर यांनी आभार मानले. राष्ट्रगीताने कार्यक्रमाची सांगता झाली.
टिप्पणी पोस्ट करा
0 टिप्पण्या