विचारांची मशाल पेटली, सावित्रीबाई फुले वाचनालयात जिजाऊ–विवेकानंद जयंती

वणी :

‎           क्रांतीज्योती सावित्रीबाई फुले वाचनालय, विठ्ठलवाडी, वणी येथे दिनांक १२ जानेवारी २०२६ रोजी राजमाता जिजाऊ जयंती व स्वामी विवेकानंद जयंती निमित्त अभिवादन कार्यक्रमाचे आयोजन करण्यात आले. या कार्यक्रमातून मातृशक्ती, राष्ट्रभक्ती व तरुणाईच्या प्रेरणादायी विचारांचा जागर करण्यात आला.

‎        कार्यक्रमाची सुरुवात जिजाऊ वंदनेने करण्यात आली. राजमाता जिजाऊ यांच्या त्याग, संस्कार व राष्ट्रनिष्ठेचे स्मरण करून देणाऱ्या या वंदनेमुळे संपूर्ण सभागृहात प्रसन्न, भारलेले व प्रेरणादायी वातावरण निर्माण झाले. उपस्थितांमध्ये राष्ट्रप्रेम, संस्कारांची जाणीव व अभिमानाची भावना जागृत झाली.

‎         कार्यक्रमाच्या अध्यक्षस्थानी वाचनालयाचे अध्यक्ष प्रा. बाळकृष्ण राजुरकर तर प्रमुख अतिथी मराठा सेवा संघ, वणीचे अध्यक्ष मा. अंबादास वागदरकर यांनी उपस्थितांना मार्गदर्शन केले. राजमाता जिजाऊ यांच्या संस्कारक्षम मातृत्वातून छत्रपती शिवाजी महाराजांसारखा राष्ट्रपुरुष घडला, तसेच स्वामी विवेकानंदांच्या विचारांनी तरुणाईला आत्मविश्वास, राष्ट्रनिष्ठा व चारित्र्यनिर्मितीची दिशा दिली, असे प्रतिपादन त्यांनी केले.

‎           यावेळी वाचनालयाचे आजीवन सभासद मंगेश खामनकर यांनीही आपले मनोगत व्यक्त केले. जिजाऊंच्या मातृत्वातील मूल्ये आणि विवेकानंदांच्या विचारांचा आजच्या तरुण पिढीने आत्मसात करणे काळाची गरज असल्याचे त्यांनी सांगितले. वाचन, चिंतन व सामाजिक बांधिलकीतूनच सक्षम राष्ट्रनिर्मिती शक्य असल्याचे त्यांनी अधोरेखित केले.

‎       अध्यक्षीय भाषणात प्रा. बाळकृष्ण राजुरकर यांनी वाचनालये ही केवळ पुस्तकांची नव्हे तर विचारांची व संस्कारांची केंद्रे असल्याचे सांगत समाजघडणीत अशा उपक्रमांचे महत्त्व अधोरेखित केले. वाचन, विवेक व मूल्यशिक्षण ही काळाची गरज असल्याचे त्यांनी नमूद केले.

‎         कार्यक्रमाचे प्रास्ताविक वाचनालयाचे सचिव प्रा. विजय बोबडे यांनी केले. त्यांनी जयंती उत्सवामागील भूमिका स्पष्ट करत समाजात प्रेरणादायी विचार रुजविण्याचा उद्देश सांगितला. संचालन ग्रंथपाल शुभम कडू तर आभार प्रदर्शन वाचनालयाचे संचालक मारोती जीवतोडे यांनी केले. कार्यक्रमाचे नियोजन सहाय्यक वैभव येरगुडे यांनी केले.

‎       या कार्यक्रमास मराठा सेवा संघाचे पदाधिकारी व सदस्य, वाचनालयाचे पदाधिकारी, संचालक, आजीवन सभासद, वाचक, युवक व परिसरातील नागरिक मोठ्या संख्येने उपस्थित होते. प्रेरणादायी वातावरणात संपन्न झालेल्या या कार्यक्रमामुळे उपस्थितांना राष्ट्रनिर्मितीच्या मूल्यांची नवी ऊर्जा मिळाली.