वाचनालयात जागवली सामाजिक परिवर्तनाची ऊर्जा : फुले स्मृतीदिन कार्यक्रम उत्साहात

वणी :

           क्रांतिज्योती सावित्रीबाई फुले सार्वजनिक वाचनालय, विठ्ठलवाडी वणी येथे महात्मा ज्योतिबा फुले स्मृतीदिनानिमित्त आयोजित कार्यक्रम खऱ्या अर्थाने प्रेरणादायी विचारांचा झरा ठरला. शिक्षण, समता आणि समाजजागृतीची ज्योत पेटविणाऱ्या महात्मा फुले यांच्या कार्याची उजळणी करत सर्वांनी नवऊर्जा घेत आदरांजली वाहिली.

           कार्यक्रमाचे अध्यक्ष प्रा. बाळासाहेब राजुरकर यांनी महात्मा फुले यांच्या विचारांचे आजच्या युवा पिढीशी नाते सांगत, “वाचनालय म्हणजे विचारांचा क्रांतिकारी दीपस्तंभ” असे मनोज्ञ भाषण केले. प्रमुख पाहुणे प्रा. पुरुषोत्तम पाटील यांनी फुले दांपत्याने समाजासाठी केलेल्या अमूल्य कार्याचा उल्लेख करून, “समता आणि शिक्षण हीच खरी प्रगतीची किल्ली” असा प्रेरक संदेश दिला.

          कार्यक्रमाचे सुयोग्य संचालन व प्रभावी प्रास्ताविक प्रा. विजय बोबडे यांनी केले. समारोपात प्रा. अनिलकुमार टोंगे यांनी फुले दांपत्याच्या आदर्शांवर आधारित वाचनालयाच्या पुढील उपक्रमांची माहिती देत उपस्थितांचे मनःपूर्वक आभार मानले.

      वाचनालयाचे कोषाध्यक्ष अशोक चौधरी, आजीवन सभासद व अभ्यासिकेचे संचालक भाऊसाहेब आसुटकर, प्रभाकरराव मोहितकर, कर्मचारीवर्ग तसेच अनेक अभ्यासक उपस्थित होते.

         कार्यक्रमात ज्ञानगाथा, प्रेरक भाषणे आणि महात्मा फुले यांच्या विचारांची उजळणी यामुळे सर्वांनाच नवीन उर्जा, आत्मविश्वास आणि समाजासाठी काहीतरी करण्याची प्रेरणा मिळाली. वाचनालयातून प्रसारित झालेली ही विचारज्योत उपस्थितांच्या मनामनात उजळून राहिली.