राष्ट्रीय शरीरसौष्ठव स्पर्धेत, वणीतील अक्षय खामनकर यांनी पटकावला पाचवा क्रमांक

वणी :

          हैदराबाद येथे नरेश सूर्या क्लासिक हैद्राबाद ऐक्सो नर्फे २०२४ ची शरीरसौष्ठव स्पर्धा (राष्ट्रीयस्तर) आयोजित केली होती. राष्ट्रीय शरीरसौष्ठव स्पर्धा २०२४-२०२५ चा सोहळा मोठ्या दिमाखात पार पडला. भव्य व्यासपीठ, पिळदार शरीर आणि भव्य लाईटच्या झगमगात ही स्पर्धा पार पडली. या स्पर्धेसाठी अनेक राज्यातून सुमारे ४० हून अधिक शरीरसौष्ठवांनी आपली उपस्थिती लावून हैदराबाद येथील शरीरसौष्ठव स्पर्धेत रंगत आणली.

            या स्पर्धेमध्ये यवतमाळ जिल्हातील वणी शहरामध्ये शेतकरी नगर येथे वास्तव्यास असलेले अक्षय गणेशराव खामनकर यांनी पाचवा क्रमांक पटकावला असून सन्मानचिन्ह प्राप्त केले.

                अक्षय गणेशराव खामनकर यांनी दहावी आणि बारावी चे शिक्षण वणीतील एस.पी.एम. शाळेत  घेतले. यानंतर पुढील शिक्षण नागपूर येथील प्रियदर्शनी इंजिनिअरिंग कॉलेज मधून घेत अभियंता पदवी मिळवली. शालेय जीवनात क्रिकेटची भयंकर आवड होती. त्यातून तो विदर्भस्तरावर क्रिकेटमध्ये  खेळला. त्यानंतर त्याला बॉडीबिल्डिंगची आवड निर्माण झाली. या क्षेत्रामध्ये आज तो राष्ट्रीय स्तरावर उत्कृष्ट प्रदर्शन करीत आहेत. 

                सद्यस्थितीत मुंबई या ठिकाणी कोच प्रशिक्षक म्हणून काम करत आहेत. या यशात त्यांचे वडील श्री. गणेशराव खामनकर आणि आई मायाताई खामनकर तसेच मोठे बंधू सचिन खामनकर यांचे मार्गदर्शन व प्रोत्साहन मिळाले. अक्षय यांच्या या यशाबद्दल परिसरातून आणि शहरातून त्यांच्यावर कौतुकाचा वर्षाव होत आहे.

⭕    शरीरसौष्ठव स्पर्धा म्हणजे ?

                    शरीरसौष्ठव म्हणजे मानवी शरीराचा सुडौल आणि सुबद्ध आकार होय. शारीरिक उंचीच्या प्रमाणात वजन असणे आणि खांदे, मान, छाती, कंबर, बाहू, पाय, पोटऱ्या यांची वाढ सतमोल प्रमाणात झालेली असणे, तसेच स्नायूंची प्रमाणबद्ध वाढ व पिळदारपणा या घटकांना शरीरसौष्टवात अतिशय महत्त्व आहे. बळकट, चपळ आणि बांधेसूद शरीरसौष्टवासाठी दीर्घकालीन, योजनाबद्ध व्यायामाची आवश्यकता असते. शरीरसौष्ठव-स्पर्धकास आपल्या उंचीच्या आणि अस्थिरचनेच्या प्रमाणात आवश्यक असे जास्तीत जास्त वजन प्राप्त करावे लागते. शरीरसौष्ठवासाठी प्रमुख व्यायाम म्हणजे वजन उचलणे होय. 'टू हँड्स मिलिटरी प्रेस' (बाहू व खांद्यांसाठी) 'उतरत्या फळीवरचे सिटअप्स' (कंबर, छाती यांसाठी), लँट मशीन' (पाठ व खांदे यांसाठी), 'डंबेल्स प्रेस' (खांदे व दंड यांसाठी), 'ट्रंक बेडिंग' (बाहू व पाठीचा कणा यांसाठी) हे शरीरसौष्ठवासाठी आवश्यक असलेले, वजन उचलण्याचे काही व्यायामप्रकार होत. संपूर्ण शरीराची प्रमाणबद्धता साधण्यासाठी नियमित व्यायाम व साराव आणि योजकता यांचा मेळ साधावा लागतो. शरीराच्या कोणत्याही भागाची कमी वा जास्त वाढ होऊ नये, म्हणून व्यायाम करताना विशेष दक्षता घ्यावी लागते.