वणी :
यवतमाळ जिल्हा मध्यवर्ती सहकारी बँकेच्या संचालकपदाच्या निवडणुकीत वणी गटातून अपक्ष उमेदवार सुनील कातकडे यांनी विजय मिळविला. त्यांनी महाविकास आघाडीचे प्रा. टिकाराम कोंगरे आणि महायुतीचे दीपक मत्ते यांना मागे टाकत सर्वांचे लक्ष वेधले. मारेगाव गटातून किरणताई देरकर, तर झरी गटातून राजीव येलटीवार विजयी झाले.
११ ऑक्टोबर रोजी झालेल्या या निवडणुकीत सर्व मतदारांनी मतदानाचा हक्क बजावत शंभर टक्के मतदानाची नोंद केली. वणी गटातील अपक्ष उमेदवाराच्या विजयामुळे राजकीय आघाड्यांच्या गणितांना धक्का बसला आहे.
या निकालातून स्थानिक पातळीवरील जनसंपर्क आणि उमेदवारांची रणनीती निर्णायक ठरल्याचे स्पष्ट झाले. तिन्ही गटांतील निकालांमुळे जिल्हा बँकेच्या राजकारणात नव्या समीकरणांची चर्चा सुरू झाली आहे.
