शहरातील विठ्ठलवाडी- कनकवाडी परिसरात गेल्या काही दिवसांपासून अत्यंत घाण व दूषित पाणीपुरवठा होत असल्याने स्थानिक नागरिकांमध्ये तीव्र नाराजी व्यक्त होत आहे. नळाद्वारे येणारे पाणी इतके गढूळ आणि दुर्गंधीयुक्त आहे की ते पाहून जणू काही नालीतील पाणीच पुरवले जात आहे की काय, असा सवाल नागरिकांकडून उपस्थित केला जात आहे.
स्थानिकांच्या म्हणण्यानुसार, गेल्या काही दिवसांपासून घरगुती वापरासाठी येणाऱ्या पाण्याचा रंग बदललेला असून त्याला तीव्र दुर्गंधी येत आहे. अनेक घरांमध्ये हे पाणी पिण्यास किंवा स्वयंपाकासाठी वापरणे अशक्य झाले आहे. त्यामुळे नागरिकांना पर्यायी पाण्याच्या स्रोतांचा आधार घ्यावा लागत असून अतिरिक्त आर्थिक भारही सहन करावा लागत आहे.
या दूषित पाण्यामुळे परिसरातील नागरिकांच्या आरोग्यावर विपरीत परिणाम होत असल्याची चिंता व्यक्त केली जात आहे. विशेषतः लहान मुले आणि ज्येष्ठ नागरिकांमध्ये पोटदुखी, उलट्या, जुलाब, त्वचारोग तसेच इतर संसर्गजन्य आजारांच्या तक्रारी वाढल्याचे नागरिक सांगत आहेत. दूषित पाण्यामुळे भविष्यात आणखी गंभीर आरोग्य समस्या निर्माण होण्याची भीतीही व्यक्त होत आहे. पाणीपुरवठा व्यवस्थेतील गळती, जुन्या पाइपलाइनमधील बिघाड किंवा सांडपाण्याची मिसळ होत असल्यामुळे ही समस्या निर्माण झाली असावी, अशी शक्यता व्यक्त केली जात आहे.
दरम्यान, या गंभीर समस्येकडे नगरपरिषद वणी प्रशासन दुर्लक्ष करत असल्याचा आरोप नागरिकांनी केला आहे. संबंधित अधिकाऱ्यांनी तातडीने पाण्याचे नमुने तपासणीसाठी पाठवून दूषित पाणीपुरवठ्याचे कारण शोधावे आणि नागरिकांना स्वच्छ व सुरक्षित पाणी उपलब्ध करून द्यावे, अशी मागणी होत आहे.
विठ्ठलवाडी परिसरातील नागरिकांनी प्रशासनाने त्वरित हस्तक्षेप करून समस्या कायमस्वरूपी सोडवावी, अन्यथा तीव्र आंदोलनाचा मार्ग स्वीकारण्याचा इशाराही दिला आहे. नागरिकांच्या आरोग्याशी संबंधित असलेल्या या गंभीर प्रश्नाकडे प्रशासनाने तातडीने लक्ष देण्याची गरज असल्याचे मत सर्व स्तरातून व्यक्त होत आहे.
टिप्पणी पोस्ट करा
0 टिप्पण्या