आगामी वणी नगरपरिषद सार्वत्रिक निवडणुकीच्या पार्श्वभूमीवर शिवसेना (शिंदे गट) तर्फे आयोजित भव्य जाहीर सभेत उपमुख्यमंत्री एकनाथ शिंदे यांनी दमदार भाषण करत नागरिकांना थेट साद घातली. मैदानात उसळलेल्या जनसमुदायामुळे वातावरणातच उत्साह ओसंडून वाहत होता. हजारोंच्या संख्येने महिला, पुरुष, युवक, कार्यकर्ते आणि शिवसैनिक उपस्थित राहिल्याने संपूर्ण मैदान गजबजून गेले होते.
उपमुख्यमंत्र्यांनी आपल्या प्रभावी भाषणात वणी शहराच्या विकासाचा मुद्दा अग्रस्थानी ठेवत नागरिकांशी संवाद साधला. “वणी शहरातील अनेक ज्वलंत प्रश्न सोडवण्यासाठी शिवसेनेचा झेंडा पुन्हा एकदा नगरपरिषदेत फडकला पाहिजे. शहराच्या सर्वांगीण विकासासाठी सक्षम नेतृत्व निवडणे गरजेचे आहे,” असे ते म्हणाले.
यावेळी त्यांनी शिवसेना (शिंदे गट) तर्फे वणी नगरपरिषदेतील सर्व उमेदवारांचा परिचय करून दिला. नगराध्यक्षपदाच्या उमेदवार म्हणून कु. पायल तोडसाम यांची शिफारस करत त्यांनी त्यांच्या संपूर्ण पॅनलला मनःपूर्वक शुभेच्छा दिल्या. “ही टीम मेहनती, तरुण आणि विकासाभिमुख आहे. वणीच्या प्रगतीसाठी या संपूर्ण पॅनलला प्रचंड मताधिक्याने विजयी करा,” असा उत्साहवर्धक संदेश उपमुख्यमंत्र्यांनी नागरिकांना दिला.
तसेच वणीतील पाणीपुरवठा, रस्ते, स्वच्छता, पायाभूत सुविधा, बाजार व्यवस्था यांसारख्या समस्यांचा उल्लेख करत, आगामी काळात या प्रश्नांचे निराकरण करण्यासाठी महापालिका व राज्य सरकार समन्वयाने काम करेल, असेही त्यांनी सुनिश्चित केले.
सभेला जिल्ह्याचे पालकमंत्री संजय राठोड, शिवसेनेचे हरिहर लिंगनवार, विजय चोरडिया, विनोद मोहितकर, मनीष सुरावार, तसेच इतर अनेक मान्यवरांची उपस्थिती लाभली. शिवसैनिकांनी घोषणाबाजी व टाळ्यांच्या कडकडाटाने संपूर्ण परिसर दुमदुमून सोडला.
या जाहीर सभेमुळे निवडणुकीतील वातावरण अधिक तापले असून आगामी लढतीची रंगत वाढली आहे.
टिप्पणी पोस्ट करा
0 टिप्पण्या