वणी :
दि. १५ ऑगस्ट २०२५ रोजी क्रांती ज्योती सावित्रीबाई फुले सार्वजनिक वाचनालय, विठ्ठलवाडी वणी येथे भारताच्या ७९ व्या स्वातंत्र्यदिनानिमित्त मोठ्या उत्साहात कार्यक्रम साजरा करण्यात आला. या कार्यक्रमात स्थानिक नागरिक, विद्यार्थी, वाचनप्रेमी आणि वाचनालयाचे पदाधिकारी, सदस्य आणि आजीवन सभासद मोठ्या संख्येने उपस्थित होते. सकाळी ०७:३० वाजता वाचनालय परिसरात ध्वजारोहणाचा कार्यक्रम पार पडला. वाचनालयाचे अध्यक्ष श्री. प्रा. बाळासाहेब राजूरकर यांच्या हस्ते ध्वजारोहण करण्यात आले. यावेळी उपस्थितांनी राष्ट्रगीताने देशप्रेमाचा उत्साह व्यक्त केला. त्यानंतर, स्वातंत्र्यदिनाच्या महत्त्वावर आणि क्रांतीज्योती सावित्रीबाई फुले यांच्या शिक्षण क्षेत्रातील योगदानावर प्रकाश टाकणारी भाषणे झाली.
या प्रसंगी बोलताना, प्रा. बाळासाहेब राजूरकर यांनी सावित्रीबाई फुले यांच्या शिक्षण आणि सामाजिक सुधारणेच्या कार्याला उजाळा देत, "शिक्षण हेच खऱ्या स्वातंत्र्याचे आधारस्तंभ आहे. सावित्रीबाईंनी स्त्रियांना आणि वंचितांना शिक्षणाची दारे खुली करून खऱ्या अर्थाने स्वातंत्र्याचा पाया रचला," असे प्रतिपादन केले. यावेळी कोषाध्यक्ष अशोक चौधरी यांनी देशभक्तीपर गीत व संचालकांनी भाषणे सादर केली, ज्यामुळे उपस्थितांमध्ये जोश निर्माण झाला.
कार्यक्रमाच्या समारोपात, उपस्थितांनी देशाच्या प्रगतीसाठी आणि सामाजिक समतेसाठी सावित्रीबाई फुले यांच्या विचारांचा अवलंब करण्याचा संकल्प केला. हा कार्यक्रम वाचनालयाच्या सामाजिक बांधिलकीचे आणि शिक्षणप्रसाराच्या ध्येयाचे प्रतीक ठरला.
कार्यक्रमाचे संचालन सचिव प्रा. विजय बोबडे, प्रास्ताविक सहसचिव गजेंद्र भोयर तर उपस्थितांचे आभार प्रा. अनिलकुमार टोंगे यांनी मानले. कार्यक्रमाच्या यशस्वीतेसाठी कर्मचारी यांनी परिश्रम घेतले.
